Ексклузивно: список на соработници на Бин Ладен кои дејствуваат во Македонија
Муџахедините ја иницирале и ја финансирале структурата на ОНА
Најмалку десетина блиски соработници на Осама бин Ладен се директно и лично инволвирани во инсталирањето на муслиманскиот фундаментализам, во организирањето, во финансирањето и во вооружувањето на албанските терористи на ОНА во Македонија. За време на косовската криза, овие луѓе престојувале во Косово и за тоа време успеале да се инфилтрираат и во Македонија и да ја иницираат структурата на ОНА. Повеќемина од нив престојувале, а некои од нив се уште престојуваат на територијата на Македонија илегално или легално, но со лажни пасоши. "Утрински весник" успеа да дојде до листата на централните личности во мрежата на дејствување на организацијата на Бин Ладен на Балканот.

Станува јасно по кои канали се доставуваше оружје за терористите на ОНА што деновиве го собира НАТО

СЕРВИС "УТРИНСКИ ВЕСНИК"

На македонската полиција и е познато дека муџахединските борци тука располагаат со возила со таблички на странски хуманитарни мисии

Сомневање во работата на филијалите на хуманитарни организации, чии централи најчесто се наоѓаат во муслиманските земји

Фатах Али Хасанин, по потекло од Саудиска Арабија, е член на најтесното раководство на организацијата на Осама бин Ладен, Ал Каида (Ал Љаида). Тој е еден од водачите на екстремниот џихад задолжен за Југоисточна Европа. За време на косовската криза, дознаваме од релевантни разузнавачки извори, Хасанин престојувал во Македонија, во Скопје, Тетово и во Гостивар. Одвреме-навреме, со возило на КФОР со француски регистерски таблички, тој патувал и во Косово, каде што биле регистрирани неколку средби со Хашим Тачи, поранешниот лидер на УЧК, а сега челник на Демократската партија на Косово. Во овој контекст, на македонската полиција и е познато дека терористите на ОНА, а особено муџахединските борци, тука располагаат со неколку возила и џипови со таблички на странски хуманитарни мисии, на дипломатски претставништва, на НАТО или на КФОР. Најголемиот дел од овие таблички се украдени или се фалсификувани.

Во последниве неколку години, Фатах Али Хасанин престојувал во Виена, каде што регистрирал хуманитарна организација под името Третиот свет". Негова основна задача, тврдат разузнавачите, е обезбедување финансиски средства за ширење на исламскиот фундаментализам на Балканот, особено во Косово и во Македонија. Во повеќе наврати од 1995 година наваму, МВР се сомневаше во работата на неколку хуманитарни организации кои во Македонија отворија свои филијали. По правило, централите на овие организации се во Џеда или некој друг центар на муслиманскиот свет. При претрес на канцелариите на една од овие организации во центарот на Скопје пред неколку години, меѓу другото, полицијата заплени цел товар книги за ширење на исламскиот фунадаментализам. Таа организација се уште дејствува во Македонија и беше најактивна во транспортот на помош во Липковскиот крај.

Блискиот соработник на Бин Ладен, Хасанин, се идентификува како организиратор на обуката на албанските милитанти во Македонија и во Косово. Од самите зачетоци на косовската УЧК, вакви тренинг- кампови беа направени во Албанија, во градовите Бајрам Цури, Тропоја, Кукс. Некои од овие кампови се уште функционираат (таму се обучуваа терористите од ОНА), а по влегувањето на НАТО во Косово, некои од камповите се дислоцираа во околината на Призрен, Гнилане и на други места. Извесно време, Хасанин бил советник и на Алија Изетбеговиќ во Босна. Оттаму, пак, познато е дека во босанската војна, стотици воини на џихад беа лоцирани во формацијата наречена Втора санџачка. Во неговата мрежа на движење во регионот влегуваат и Букурешт и Софија.

Втор на оваа листа е Омар Алавади, исто така, по потекло од Саудиска Арабија. Тој е директно надлежен за Балканот, мошне близок човек на Бин Ладен и непосредно поврзан соработник со Хасанин, тврдат разузнавачки извори. Поборник на екстремниот џихад, кој се занимава околу финансирањето на исламскиот фундаментализам на Балканот, со посебен акцент на Косово и Македонија. За него постојат докази дека е директен организатор на обуката на албанските терористи во Македонија. Исто така, оперативните разузнавачки сознанија ја потврдуваат неговата непосредна соработка со албанските екстремисти од Тетово, Гостивар, Скопје и од Кичево. Неговото место на престој е меѓу македонскиот главен град и Атина.

Следниот во хиерархијата е Еди Дебси, кој е главен соработник на Омар Алавади и за него се смета дека е поврзан со германските тајни служби. Тој е главниот оперативен организатор на активностите на теренот во Македонија и во Косово.

Фатах Али Хасанин и Омар Алавади се клучните организатори на формирањето на таканаречената ослободителна војска на Македонија - ОВМ (тоа што сега кај нас се нарекува ОНА), по урнекот на косовската УЧК. За формирањето и дејствувањето на ОВМ (како што ОНА на почетокот се водела во папките на странските разузнавачки служби), биле пристигнати неколку членови на екстремниот џихад, по потекло од Египет, кои во Македонија влегле илегално од Романија. Тоа биле Ашраф Самир Ахмед Мохамед Али (роден 09.03.1975 година), потоа Хешам Абд ел Хамид Мохамед Шната (роден 10.07.1968) и Јосри Абд ел Садек (роден 1968). Овие лица престојувале илегално во западниот дел на Македонија, во Тетово и во Гостивар, и постојано патувале но, според некои информации, се уште патуваат на релации кон Косово и Албанија. Тие непосредно контактираат со Хашим Тачи во Приштина, категорични се изворите на Утрински".

Разузнавачките служби кои работат во регионот, пред извесно време, дознаваат дека за активностите на ОВМ (ОНА) било нарачано оружје преку две лица на Бин Ладен, по потекло од Египет и од Саудиска Арабија, кои престојувале во Букурешт. Тоа се лицата Абу Мидал Сагр Шагер Абделхади и Муџахед Мустафа ал Бакари, кој, пак, поседува пасош на име Јавад Јарабат Јамил. Фирмата која требало да го испорача оружјето е "Морисон и Мартин", 112 Авенуе Клегер, 75016 Парис. Претседател на Управниот одбор на оваа фирма е Џорџ Старкман. Нашите извори не може да ги прецизираат информациите кои говорат дека во нашава држава требало да се внесе или веќе било внесено извесно количество најмодерно оружје за потребите на ОНА. Меѓутоа, тоа што со сигурност се знае е дека разузнавачките служби поседуваат детален список на ова оружје